قصة وطن --- قصة ثورة

--------------((قصة وطن ))--------------
--------------((قصة ثورة ))---------------

يامصر قامت قيامتك
والشباب غير نهايتك
قاموا وهبوا ع النظام
واشتركوا فيها شباب عظام
وقفوا وقالوا للنظام
امشى وارحل يانظام
أحزاب كتير وقفوا وهبوا
ورجال كتير من برة وصلوا
والكل طلب المشاركة
حتى الغريب حاز الموافقة
واندس فيها ناس كتير
يشوهوا سمعة بلدنا
لكن الشباب وقفوا بعزة
نفس عِزة الفراعنة
وقف الشباب على كل حارة
وكل شارع أو طريق
وفى ايدة ماسك
ايد خشب أو ايد حديد
وبكفة يضرب معتدى
أو أى قاطع للطريق
وسمعنا من الاعلام نشرات كتير..وكلام كتير
عن عملا .. وخونة .. وكمان صمود فى التحرير
آراء كثيرة اتبدلت
واشخاص كتيرة اتحولت
أحزاب ووطنيين.. الكل بقى قسمين
قوايم بيضا وقوايم سودا
حتى اختلفوا ع الوطنيين
حطوا عصام وشالوا شفيق
وجابوا وزير وشالوا وزير
والمزرعة صبحت مزار
بعد اما لمت الأشرار
واتحولوا الأشرار الى أحرار
واتحولوا الأخيار الى أشرار
قالوا الجيش هو الأمل
بس الدولة تكون مدنية
قالوا العدل هو الثمن
بس نشوف فين الحرية
واتعدل الدستور..والكل وقف فى الدور
خلاص بقالنا رئيس
كفاية بقى تهييس
وهنكتب الدستور
وفى يوم طويل وقصير
طلع لنا دستور
قلنا علية دا عويل
قالوا اعملوا التعديل
حتى البعيد الشورى
جعلوا منة دليل
بيشرع القوانين
وبيحكمة الفاشلين
حتى النظام بقى غابة
والكل عاش فى كآبة
لف بضناك يازمن
وأوعاك تجور ع الغلابة
دى مصر هى الوطن
وولادها هما الأمانة
ارجع بظهرك يازمان
وأوعاك تكمل للنهاية
وقف الزمان وارتجع
وقال خلاص نعزلة
والكل ضرب الودع
والحكم كان نحبسة
وعملوا للطريق خارطة
ونفذوا أول نقطة
وعدلوا الدستور.. ووقف الجميع فى طابور
والخارطة كانت شارطة
ان النيابة الأول
واتعدلت الخارطة
بقت الرئاسة الأول
وسع لى حضنك يازمان
افتح لنا كل البيبان
اقفل على جراح الألم
وافتح لنا أبواب الأمل
قوم ياوطن انت ابتدى
وارسم بنفسك النهاية




+طلعت عامر