ثورة على النفس
***********
ثاروا وثورنا
كانوا وكنا
ولاحد شالنا
ولاحد سابنا
والهم صابنا
طلِعت عنينا
والفقر زاد
والفساد أصبح مالينا
والضمير بقى فى المزاد
يالا ثوروا تانى مرة
ثورة لكن مش عادية
ثورة تمحى البلطجية
تبنى نفس كمان ذكية
ثورة تانى فى الميدان
ثورة تفتح البيبان
لكل عاطل أو فقير
مش للجبان او للحقير
ثورة تانى على العروش
اللى بنت من السرقة كروش
اجرى وامسك حلق حوش
كل فاسد عاش فشوش
والفقير بقى ممعهوش
لقمة ناشفة او غموس
ثورة تانى ع الضماير
اللى كان فى الغش ساير
والنفاق كان فينا صاير
اللى لما الحق بان
حطوا ع الحيطان ودان
شوشروا لينا الودان
واللى ثار.. قالوا عنة خان
ثورة تانى ع النفوس
اللى عاشت للفلوس
اللى كات للايد تبوس
اللى زمت فى اللى فات
واللى نافقت كل آت
ثورة تانى من جديد
نبنى بعض من جديد
بعزيمة أقوى من الحديد
نشتغل ونصون بلادنا
بالعمل نحفظ ولادنا
والنجاح هيكون أملنا
والأمان هيكون وصالنا
يالا ثوروا تانى مرة
ثورة ع النفس العتية
+طلعت عامر
تعليقات
إرسال تعليق