عدى الزمان

**** عدى الزمان ****
ــــــــــــــــــــــــــــــــــ

مين قاتل ومين مقتول
ومين بكره عليه الدور
ومين يؤمر ومين مسؤل
ومين فاهم ومين مغرور

****

وليه الموت سكن دارنا
وريحة الدم غطتنا
وليه الخير هجر ناسنا
وبات الشر فى راسنا

****

وكله يعادى بالمقلوب
ماعاد غالب ولامغلوب
ويسكن غل جوه قلوب
ويطلع نار على المحبوب

***

نعيش الدنيا بالحسره
وتيجى الدمعه بالكسره
وعين الناس ماهش كاسرة
وراس الناس ماهش راسيه

****

يادنيا لمتك ناقصه
على الأحبال ليه راقصه
وتحلى توحلى الناقصه
وتكسى توكسى الواكسه

****

مين تابع ومين متبوع
ومين سامع ومين مسموع
ومين اسمه يكون مرفوع
يجارى الدنيا يوم مايجوع

****

كلام الناس مش دستور
لكن ف الناس يكون منظور
ساعات تلاقيه كلام موتور
وبعض الوقت يصبح زور

****

والفاضى عمل قاضى
ف سيرة الناس صبح حاكى
تجيب الكلمه عن نفسه يصير شاكى
كلام الناس على الفاضى

****

يادنيا قربى ودك
وخلينا هنا جنبك
على ضيك على خدك
وتحمينا سما ربك

****

ومين يحلم ببكره الجاى
ومين يشرب معانا الشاى
وأنا أحكى .. ويعزف ناى
نعيش العمر يصبح جاى

****
عدى الزمان وخلاص اهو بان
واللى غدر ظهر وبان
مين اللى حب مين اللى خان
فين اللى كان عنتر زمان

طلعت عامر

+طلعت عامر